١ لما تقطفى الملوخية خدى حتة من العرش معاكى وزى ما تفقنا سيبى الباب موارب وتبقى رشى عليها رشة بيكنج بودر بتخليها ما تسودش وبالهنا والشفا ياعسل
٢ لما تقلى السمك غطسية فى مية وهو رايح ع الطاسة بيبقى مقرمش والزيت يفضل نظيف للأخر وقطعى لمونة وانزلى بيها فى الزيت مش بيخلى ريحة خالص للسمك فى الشقة وابقى ادعيلى
٣ لما تعجنى رقاق حطى ع الدقيق معلقة بيكنج بودر بيخلية هش ومش معجن
٤ لما تيجى تحشى ممبار هاتى زجاجة مياة صغيرة وقصى بوزها من قدام واحشى بية هتحشى الممبار فى وقت قياسى ولما تيجى تسوية يغلى غلوة واحدة ووطى علية النار عشان ما يفرقعش ربنا ما يفرقعلك مرارة
٥ لما تعملى عيش باللحمة تبقى قطعى ورقة نعناع على الخلطة بتعمل نكهه حلوة اوووى
٦ ما تحطيش الملح ع السلطة غير ع التقديم ويسلام لو رشة خل وفص توم
كوباية شاى ولا قهوة يا عسل انتى بخيلة ولا اية
نظافة
١ وانتى بتاخدى شاور ادعكى الحمام معاكى بالمرة ما انتى كدة كدة مبلولة بس اوعى تتزحلقى
٢ وانتى بتتوضى اغسلى الحوض معاكى هيبقى فلة
٣ لمى الغياريين بتوعك وبتوع عيالك واغسليهم يوم بيوم صدقينى هتحسى بإنشكاح لما تلاقى باسكت الغسيل فاضى
والفوط ماتركنيهاش ف الباسكت هاتكمكم اغسليها لوحدها بمسحوق قليل وكوب خل وملح ليمون مش هاتلاقى لها ريحة وتبقى منفوشة
٤ جهزى بخاخة فيها دوا نمل ولما تلاقى نملة اقتلى امها عشان تحرم تدخل بيوت الناس من غير استأذان
٥ حضرى باسكت فاضى للعب العيال وزينية وعلميهم يلموا اللعب لما يخلصوا بدل ما صوتك جايب اخر الشارع
٦ ما تنسيش نفسك فى زحمة اليوم خلى لنفسك وقت دلعى نفسك فية
٧ بخاخة فيها معطر وبوخى بخة كل شوية افتحى نفس الراجل لما يجى يلاقى ريحة البيت حلوة زيك كدة ياعسل
٨ قبل اما تنامى روقى شقتك وشطبى مطبخك وعود بخور كدة فى البيت مع شوية قرآن واقرئى ورد من القرآن مع اطفالك ياااااة ع الراحة النفسية تصدقى انا ارتحت
كمان خليكى دايما على وضوء علشان تصلى الفرض اول مايأذن ماهوا المطبخ دة بينسينا روحنااوعى يفوتك فرضك
تعليقات
إرسال تعليق